Ar Ddiwrnod y Llyfr, 1 Mawrth 2007, bydd teitlau newydd sbon yng nghyfres Stori Sydyn/Quick Reads yn cael eu lansio

Lansiwyd cynllun Stori Sydyn/Quick Reads yn 2006 i gynnig cyfres o lyfrau byr, cyffrous, byrlymus, wedi’u hysgrifennu'n benodol gan awduron poblogaidd, ar gyfer oedolion sy’n egin ddarllenwyr, y sawl sydd wedi colli’r arfer o ddarllen neu unrhyw un sy'n chwilio am lyfr i’w ddarllen yn sydyn.

Mae hwn yn fenter ar y cyd rhwng yr Asiantaeth Sgiliau Sylfaenol a Chyngor Llyfrau Cymru. Ariennir y llyfrau gan yr Asiantaeth Sgiliau Sylfaenol fel rhan o Strategaeth Genedlaethol Sgiliau Sylfaenol Cymru ar ran Llywodraeth Cynulliad Cymru. Cyhoeddwyd pedwar llyfr Cymraeg a dau Saesneg yn 2006 a bydd wyth llyfr newydd sbon – pedwar Cymraeg a phedwar Saesneg – yn cael eu lansio ar Ddiwrnod y Llyfr 2007 – 1 Mawrth.